Ons ry 6:30 om betyds op Heathrow te wees. Ek is so dankbaar dat Sarel ons gaan aflaai, dit is darem net bietjie makliker as treine en moltreine met mens se bagasie. Lindi hou die dag skool so dit is 'n besige dag vir die London-Hiemstras.
Die vlug Marco-Polo toe verloop sonder voorval. Daar is 'n sitplek lang Thinus oop wat dit altyd bietjie lekkerder maak as mens vlieg. Die BA sitplekkies is maar klein.
Op Marco Polo kry ons ons bagasie en werk toe uit om met die bus tot in Venisie (eiland) te kom. Daar gekom moet ons die hotel kry wat nie so eenvoudig is nie. Die GPS-tanie help nie veel nie want sy vat ons met die agterstraatjies langs wat mens vinnig laat verdwaal. En ons sleep ons tasse, meer as 'n km ver. Toe ons oor een van die brue moet gaan, gryp twee Italianers ons tasse en help ons dra, net om aan die anderkant E20 elk te vra!! Belaglik! Ons se^ toe maar vir hulle om die tasse terug te dra maar onder luide protes boelie hulle toe wraggies E10 uit ons uit. Dis R111! Ek besluit daar en dan as 'n Italianer weer my tas wil dra begin ek luidkeels gil.
Ons hotel is Ca' Fontanea, en ons bly letterlik in die solder. Ons moet heeltyd ons nekke buig om nie ons koppe te stamp nie. maar ons het 'n stoepie of balkonnetjie wat op die dak uitloop. Na ons uitgepak het, dog ons ons le^ net bietjie maar raak altwee aan die slaap. Wat 'n waste! Slaap in Venisie! Ek probeer toe bietjie regmaak aan al die werk wat ek verloor het en vroegaand is ons toe straat in om plek te kry om te eet. Ons is meer in die nie-toeriste gedeelte van Venisie en die winkeltjies en straatmark is baie interessant. Ons werk toe maar net 'n Pizza elk deur en is terug hotel toe. Ons is gelukkig baie naby die universiteit waar die kongres is.
No comments:
Post a Comment