Ons trein vertrek 10:15 van Paris-Nord af. Ons ry met die Eurostar en dit kos fyn beplanning om ons betyds op die stasie te kry. Die grootste deurmekaarspul is die feit dat daylight-saving inskop in beide Frankryk en Engeland. Ons stel toe horlosies, selfone en vra ontvangs om ons wakker te bel, maar iewers kry ons dit nog steeds reg om alles deurmekaar te he en het ek op die ou einde net 15min om klaar te pak ipv die 1 uur en 15 min (ek was te lui om te pak die vorige aand). Met net 10min vir ontbyt eet ons gou iets en hol busstasie toe met ons hele pakkaas, net om die die bus te mis en agter te kom die busskedule is anders op Sondae en ons het 40min ipv 10 tussen die busse.
Ongelukkig mis ons die die eerste trein ook, maar gelukkig het ons nog steeds genoeg tyd ingebou dat ons 20 min voor inkloktyd by die stasie aankom. Ek is flou gestress. Daar is dit toe nog paspoortbeheer en ons arme Suid Afrikaners word weer behoorlik ondersoek en ondervra. Daai groen paspoortjie is deesdae 'n slegte ding.
Die treinrit is pragtig en eintlik baie vinnig en na bietjie meer as 2 ure is ons by St Pancras in London. Ons wen nog 'n uur ook! Ons het met Adriaan-hulle gereel om ons by Waterloo te kry 12:00 en ons moet toe met ons tasse uitsorteer hoe om by Waterloo op die moltrein te kom. Was nogal 'n storie, ons moes 2x oorklim met die pakkaas en dis trappe op en trappe af.
By Waterloo sms Adriaan dat hulle by die 'groot wiel' is, maar waar ons uitkom uit die stasie uit, is daar g'n wiel nie. Soos Murphy dit wil he is ons toe heeltemal aan die verkeerde kant en moet ons om die blok. Gelukkig is daar so 'n opskure 'grafiti allowed' tonnel waardeur ons aan die anderkant kan kom. Teen die tyd swik my knietjies al van die tasse, en wil my lyf nie meer sleep nie, maar gelukkig is Adriaan-hulle toe darem baie naby en na Ancil die taxis afgeweer het wat haar van hul staanplekke afjaag, laai ons die tjorrie vol en vat die pad na Sarel hulle toe.
Ons het heerlik gekuier. Lindi het heerlike vark gebak. Sarel en Adriaan het allerhande wyshede oor fietsry kwytgeraak en dit was net een groot vreugde dat ons almal so saam kon wees.
No comments:
Post a Comment